Servicio Editorial

Descargas previas 192

Euskal Herriko Unibertsitateko (EHU) Informatika Fakultatean Informatika Ingeniaritzako eta Adimen Artifizialeko graduko ikasketak eskaintzen dira. Bi gradu horietako ikasketa-planek Estatistikako Metodoak Ingeniaritzan irakasgaia jasotzen dute. Liburuxka hau egin dugunak aipatutako irakasgaiko irakasleak gara, eta ikasgelan jorratzen diren edukien osagarri izateko helburuarekin osatutako eskuliburua da hau; ikasleari kontzeptu teorikoen ulermena eta intuizioa hobetzeko lagungarri izateko asmoarekin egina. Kontzeptu horiek, egoki ikusi den kasuetan, R programazio-lengoaiako kode laburrarekin osatuta daude.

Gaur egun irakasle garenon eskutik dator eskuliburua, baina, bidea ibilian egiten delako, aurretik lankide izandako irakasleek ereindako aletik ere badu. Bereziki eskerrak eman nahi dizkiogu Yosu Yurramendi Mendizabali, urte askotako lankideari.

Liburuxka honetan, gaiaren sarrera orokorra (1. gaia) eta estatistika eta probabilitate-teoriari buruzko oinarrizko gaiak topatuko ditugu. Hiru atal nagusietan antolatu dira gai horiek:
1. atala. Estatistika deskribatzailea (2-4 gaiak)
2. atala. Probabilitate teoria (5-6 gaiak)
3. atala. Inferentzia estatistikoa (7-9 gaiak)

Halaber, liburuxkaren amaieran kontzeptuak lantzeko ariketa-zerrenda bat gehitu da, aipatutako ataletan eta dagozkien azpiataletan edo gaietan antolaturik.