Instalazio kimiko bat era sistematiko eta arrazionalean integratutako prozesu-unitateen multzo bat da (erreaktoreak, bero-trukagailuak, ponpak, destilazio-zutabeak, absorbatzaileak, lurrungailuak, tangak, etab.). Zenbait lehengai nahi diren produktu bihurtzea da instalazioaren helburua,
horretarako eskuragarri dauden energia-iturriak era ekonomikoenean erabiliz. Lanean ari dela, instalazio kimiko batek diseinatzaileek eta baldintza tekniko, ekonomiko eta sozialek kanpoko eragin aldakorrak (perturbazioak) direla eta ezarritako eskakizunak bete behar ditu: segurtasuna, produkzio-espezifikazioak, ingurumen-erregulazioak, egin beharreko lanaren murrizketak eta ekonomia.
Beraz, instalazio kimikoetan, uneoro gertatzen dena ezagutu eta kanpotik ekintzak egin beharra dago (kontrola), lanaren helburuak betetzen direla ziurtatzeko. Hori, ekipoen disposizio arrazional batekin (neurketa-elementuak, balbulak, kontrolagailuak, ordenagailuak) eta gizakiaren ekintzekin (instalazio-diseinatzaileak, langileak) lortzen da, eta, beren osotasunean, prozesu kimikoen kontrol-sistema osatzen dute.
