Aurkikuntza berrien erritmoa azkar doanez, diziplina zientifiko dinamiko bat irakastea —hala nola ekologia— erronka handia da. Baina ekologiako irakasleen eta ikasleen erronka are handiagoa da, sistema ekologikoak maila askotan mehatxatzen dituzten ingurumen-arazo premiazkoetan ekologiak duen garrantzia kontuan hartzen badugu. Ikasleak arazo horiek ulertzeko eta konponbideak diseinatzeko hezten saiatzen garenean, ekologiaren alderdi guztiak dira garrantzitsuak. Beraz, ekologiaren hastapenetan azpidiziplina garrantzitsu guztien oinarriak bildu beharko lirateke.
San Antonion (Texas), Ecological Society of America elkartearen 1991ko bileran, Paul Risser ekologo ospetsuak arloko kontzeptu garrantzitsuenetan kontzentratzeko erronka bota zien ekologiako irakasleei. Risserrek proposatu zuen kontzeptu nagusietan kontzentratuz gero diziplinaren egitura sendo bat eskainiko geniela ikasleei, gero kontzeptu horien gainean eraikiz joateko.
Liburu honekin Risserren erronkari erantzun nahi izan diot. Kapitulu bakoitzean, bi eta bost kontzeptu nagusi bitarte jorratzen dira, eta ikasleari gaiaren laburpen erabilgarri eta gogoangarria aurkezten zaio. Kontzeptu bakoitza kontzeptuaren ebidentzia eskaintzen duten azalpenez lagunduta dago, eta, azalpen horien bidez, ekologiaren orotariko esparruetan erabiltzen diren ikerketa-hurbilketak eskaintzen zaizkie ikasleei. Ahal denean, jatorrizko ikerketa eta hori egin zuten zientzialariak aurkezten zaizkie. Arloa sortu zuten zientzialariak orrialdeotara ekarriz eta ikasleak diziplinan barneratuz, indar berezia ematen zaio arloari, eta ikasleei informazioa gogoratzen laguntzen die horrek.
Manuel C. Molles Jr., New Mexicoko Unibertsitatea, liburuaren autorea
Ikasleengandik erreakzio positiboak jaso ohi ditut liburuari buruz. Ikastaroan zehar edo ikastaroaren ondoren, beste arlo batzuetan ikasketa sakonagoak egiteko asmoa zuten zenbait ikaslek ekologiara aldatzeko interesa adierazi izan didate, eta uste dut testuak eragina izan duela interes horretan.
Carolyn Meyer, Wyoming-eko Unibertsitatea
Ekologia: Kontzeptuak eta Aplikazioak liburua erabiltzera animatu ninduen arrazoi nagusia izan zen egileak kapitulu bakoitzean kontzeptu ekologiko gako gutxi batzuk nabarmentzen dituen modua, bai eta zientzialariek kontzeptu horiek nola “aurkitu” dituzten frogatzen duten azterketa garrantzitsuak erabiltzeko modua ere. Kontzeptuak eta horien atzean dagoen zientzia nabarmentze hori testuliburu tipikoetatik aldentzen duen freskagarria da, ekologiaren zientzia aurkeztu nahi baitu, eta ez jazoera-bilduma aspergarria egin. Uste dut testu hau irakurtzen duten ikasleek hobeto ulertzen dutela ez soilik ekologia, baita zientzia egiteko metodoa ere.
Tim Maret, Shippensburg Unibertsitatea
